യാതൊരു പ്രകോപനവുമില്ലാതെ രാജ്യാന്തര നിയമങ്ങൾ ലംഘിച്ചുകൊണ്ട് ഇസ്രയേലും അമേരിക്കയും ഇറാനെതിരെ നടത്തുന്ന ആക്രമണം ലോകത്തിൻ്റെ മുഴുവൻ സമാധാനം തകർക്കുന്നതാണെന്നും ഇതിനെതിരെ സംസ്ഥാന വ്യാപക പ്രതിഷേധം സംഘടിപ്പിക്കുമെന്നും എസ്ഡിപിഐ സംസ്ഥാന ജനറൽ സെക്രട്ടറി പി ആർ സിയാദ് വാർത്താക്കുറിപ്പിൽ പറഞ്ഞു .
ദേശീയ കമ്മിറ്റിയുടെ ആഹ്വാനപ്രകാരമാണ് കേരളത്തിലും പ്രതിഷേധം സംഘടിപ്പിക്കുന്നത്. തങ്ങളുടെ ചൊൽപ്പടിക്ക് വഴങ്ങാത്ത രാഷ്ട്രങ്ങളെയും ജനതയെയും കൂട്ടക്കൊലകളിലൂടെ വരുതിയിൽ നിർത്തുക എന്നത് എക്കാലത്തും അമേരിക്കൻ സാമ്രാജ്യത്വം സ്വീകരിച്ചു വരുന്ന നയമാണ് . സാമ്രാജ്യത്വ ഗൂഢാലോചനയിലൂടെയും അധിനിവേശത്തിലൂടെയും പിറന്ന ഇസ്രായേൽ എന്നും ഭീകര രാഷ്ട്രം തന്നെയാണ്. ഇരു രാജ്യങ്ങളും സംയുക്തമായി നടത്തുന്ന ആക്രമണങ്ങൾ ലോകത്തിൻ്റെ സമസ്ത മേഖലകളിലും ആഘാതങ്ങളും പ്രത്യാഘാതങ്ങളും ഉണ്ടാക്കും .ഇന്ത്യയുടെ വിദേശ നയം ചേരിചേരാ നയം ആണെന്നിരിക്കെ ഇസ്രായേൽ – അമേരിക്കൻ ഭീകര അച്ചുതണ്ടിലേക്ക് ഇന്ത്യയെ കൂട്ടിക്കെട്ടാനുള്ള ബിജെപി ഭരണകൂടത്തിന്റെ നീക്കത്തിനെതിരെ ഇന്ത്യൻ ജനതരംഗത്ത് വരണം. ലോകത്തിൻ്റെ വിവിധ ഭാഗങ്ങളിൽ നിന്നും തൊഴിൽ തേടി ഗൾഫ് മേഖലയിലെത്തിയ പ്രവാസികളും അവരുടെ പ്രിയപ്പെട്ടവരും ആശങ്കയുടെ നടുവിലാണ്. ഈ ഭീകരാക്രമണത്തിനെതിരെ ലോക ജനതയുടെ പ്രതിഷേധങ്ങൾക്കൊപ്പം എസ്ഡിപിഐയും അണിനിരക്കുകയാണ്. ഇതിൻ്റെ ഭാഗമായി സംസ്ഥാന വ്യാപകമായി പ്രതിഷേധ പ്രകടനം, ധർണ, യോഗങ്ങൾ തുടങ്ങിയവ പാർട്ടിയുടെ വിവിധ ഘടകങ്ങളുടെ നേതൃത്വത്തിൽ നടക്കുമെന്നും അദ്ദേഹം അറിയിച്ചു .
