സ്പോര്ട്ട്സ് ക്വാട്ടയില് നിയമനം നടത്തിയ ക്ലാര്ക്ക് തസ്തികകള്ക്ക് പകരമായി സൂപ്പര് ന്യൂമററി തസ്തികള് സൃഷ്ടിച്ച് പി.എസ്.സി റാങ്ക് ലിസ്റ്റില് നിന്നും നിയമനം നടത്തണംകെ.പി.ഗോപകുമാര്
തിരുവനന്തപുരം:സ്പോര്ട്ട്സ് ക്വാട്ടയില് നിന്നും ക്ലാര്ക്ക് തസ്തികകളിലേക്ക് വിവിധ വകുപ്പുകളില് നിയമനം നടത്തിയത് മൂലം നിലവില് കാലാവധി അവസാനിക്കാറായ പി.എസ്.സി റാങ്ക് ലിസ്റ്റിലുള്ളവര്ക്ക് നിയമനം കിട്ടാതെ ആയെന്നും ആയത് പരിഹരിക്കുന്നതിന് കാലാവധി അവസാനിക്കാറായ റാങ്ക് ലിസ്റ്റിലെ ഉദ്യോഗാര്ത്ഥികള്ക്ക് നിയമനം ലഭിക്കുന്നതിനായി സൂപ്പര്ന്യൂമറി തസ്തിക സൃഷ്ടിച്ച് നിയമനം നല്കണമെന്നും ധനദൃഢീകരണത്തിന്റെ പേരില് ഒ.എ/ടൈപ്പിസ്റ്റ് തസ്തികകളിലേക്ക് കരാര് നിയമനം നടത്തണമെന്ന് പരാമര്ശിച്ചു കൊണ്ട് ഇറങ്ങിയ ഉത്തരവ് ഭേദഗതി ചെയ്തെങ്കിലും വകുപ്പ് മേധാവികള് സാങ്കേതികത്വം പറഞ്ഞു കൊണ്ട് ടി തസ്തികകളിലെ നിയമനം തടയുന്നുവെന്നും സര്ക്കാര് തലത്തില് അടിയന്തിര ഇടപെടല് നടത്തി, ഉദ്യോഗാര്ത്ഥികള്ക്ക് നിയമനം നടത്തുന്നതിന് നടപടി സ്വീകരിക്കണമെന്നും പി.എസ്.സി റാങ്ക് ഹോള്ഡേഴ്സിന്റെ ഹെല്പ്പ് ഡെസ്ക് ഉദ്ഘാടനം ചെയ്തു കൊണ്ട് ജോയിന്റ് കൗണ്സില് ജനറല് സെക്രട്ടറി കെ.പി.ഗോപകുമാര് അഭിപ്രായപ്പെട്ടു.
ജോയിന്റ് കൗണ്സില് ചെയര്മാന് എസ്.സജീവ് അദ്ധ്യക്ഷത വഹിച്ച യോഗത്തില് സെക്രട്ടേറിയറ്റ് അംഗം ആര്.സിന്ധു സ്വാഗതവും ജോയിന്റ് കൗണ്സില് സൗത്ത് ജില്ലാ സെക്രട്ടറി വിനോദ്.വി.നമ്പൂതിരി നന്ദിയും പറഞ്ഞു. സംസ്ഥാന ട്രഷറര് എം.എസ്.സുഗൈതകുമാരി, സെക്രട്ടേറിയറ്റ് അംഗങ്ങളായ എ.ഗ്രേഷ്യസ്, എസ്.പി.സുമോദ്, എന്.കൃഷ്ണകുമാര്, പി.ശ്രീകുമാര്, വി.കെ.മധു, വി.ബാലകൃഷ്ണന്, സി.എ.അനീഷ്, സംസ്ഥാന കമ്മിറ്റി അംഗം യു.സിന്ധു, ആര്.സരിത, എസ്.കെ.എം.ബഷീര്, സൗത്ത് ജില്ലാ പ്രസിഡന്റ് ആര്.കലാധരന്, നോര്ത്ത് ജില്ലാസെക്രട്ടറി സതീഷ് കണ്ടല, കൊല്ലം പ്രസിഡന്റ് സതീഷ്.കെ.ഡാനിയല്, ജില്ലാ സെക്രട്ടറി കെ.ബി.അനു, എറണാകുളം ജില്ലാ സെക്രട്ടറി ഹുസൈന് പതുവന തുടങ്ങിയവര് പങ്കെടുത്തു.
കാസര്ഗോഡ് മുതല് തിരുവനന്തപുരം വരെയുള്ള ജില്ലകളില് നിന്നും എത്തിയ പി.എസ്.സി റാങ്ക് ലിസ്റ്റിലെ ഉദ്യോഗാര്ത്ഥികള്, നിയമനം നടക്കാതിരിക്കുന്നതിനുള്ള അവരുടെ ആവലാതിയും റാങ്ക് ലിസ്റ്റ് അവസാനിക്കുന്ന സാഹചര്യത്തില് അവര് നേരിടുന്ന ആശങ്കയും ചര്ച്ചയിലൂടെ ഉന്നയിച്ചു. നിയമനം വേഗത്തില് ആക്കുന്നതിന് സര്ക്കാര് തലത്തില് ആവശ്യമായ ഇടപെടല് നടത്തുമെന്നും ജോയിന്റ് കൗണ്സിലിന്റെ ഓഫീസിലെ രാമന് ഹാള് റാങ്ക് ഹോള്ഡേഴ്സിന്റെ ഹെല്പ്പ് ഡെസ്കായി പ്രവര്ത്തിക്കുമെന്നും യോഗം തീരുമാനം എടുത്തു. എല്ലാ ജില്ലകളിലും ഇന്ന് മുതല് ഹെല്പ്പ് ഡെസ്ക്കുകള് പ്രവര്ത്തിച്ചു തുടങ്ങും.
