എ ഐ യു ടി യു സി അഖിലേന്ത്യ സമ്മേളനം ഭുവനേശ്വറിൽ ആരംഭിച്ചു .

ഭുവനേശ്വർ:തൊഴിലും തൊഴിലാവകാശങ്ങളും സംരക്ഷിക്കാൻ തൊഴിലാളികളുടെ വീറുറ്റ പ്രക്ഷോഭം വളർത്തിയെടുക്കുക എന്ന മുദ്രാവാക്യമുയർത്തി കേന്ദ്ര ട്രേഡ് യൂണിയനായ എ.ഐ.യു.ടി.യു.സിയുടെ അഖിലേന്ത്യാ സമ്മേളനം ഒഡിഷയിലെ ഭുവനേശ്വറിൽ ആരംഭിച്ചു. സമ്മേളനത്തിൻ്റെ ഭാഗമായ പൊതുസമ്മേളനം സംസ്ഥാന സെക്രട്ടേറിയറ്റ് മന്ദിരത്തിന് സമീപമുള്ള ലോവർ പി എം ജി യിൽ നടന്നു. ഒഡിഷയിൽ നിന്നുള്ള ആയിരക്കണക്കിന് തൊഴിലാളികളും 24 സംസ്‌ഥാനങ്ങളിൽ നിന്നുമുള്ള സമ്മേളന പ്രതിനിധികളും അണിനിരന്ന പ്രകടനത്തിനു ശേഷമാണ് പൊതുസമ്മേളനം നടന്നത്.

എഐയുറ്റിയുസി അഖിലേന്ത്യ പ്രസിഡന്റ്‌ കെ. രാധാകൃഷ്ണ അധ്യക്ഷനായ പൊതുസമ്മേളനത്തിൽ വേൾഡ് ഫെഡറേഷൻ ഓഫ് ട്രേഡ് യൂണിയൻസ് (ഡബ്ലിയു.എഫ്.ടി.യു) പ്രസിഡന്റ്‌ മൈക്കിൾ മാക്വായിബ, പലസ്റ്റീൻ, നേപ്പാൾ, ബംഗ്ലാദേശ് തുടങ്ങിയ രാജ്യങ്ങളിൽ നിന്നുമുള്ള ട്രേഡ് യൂണിയൻ പ്രതിനിധികൾ, അഖിലേന്ത്യാ ജനറൽ സെക്രട്ടറി ശങ്കർ ദാസ് ഗുപ്ത, സ്വപൻ ഘോഷ്, സത്യവാൻ, അരുൺകുമാർ സിംഗ് തുടങ്ങിയവർ പ്രസംഗിച്ചു.

വൈകിട്ട് 6 മണിക്ക് ഭുവനേശ്വർ റോയൽ റിസോർട് കോൺഫറൻസ് ഹാളിൽ നടന്ന ഉദ്ഘാടന സമ്മേളനത്തിൽ വിദേശ രാജ്യങ്ങളിൽ നിന്നുള്ള പ്രതിനിധികളെ കൂടാതെ, എ ഐ ടി യു സി, സി ഐ ടി യു, എ ഐ സി സി ടി യു, ടി യു സി സി തുടങ്ങിയ കേന്ദ്ര ട്രേഡ് യൂണിയനുകളുടെ ദേശീയ നേതാക്കളും പ്രസംഗിച്ചു. രാജ്യത്തെ 24 സംസ്‌ഥാനങ്ങളിൽനിന്നുമായി വ്യത്യസ്ത തൊഴിൽ മേഖലകളിൽ പ്രവർത്തിക്കുന്ന 1300 പ്രതിനിധികൾ സമ്മേളനത്തിൽ പങ്കെടുക്കുന്നുണ്ട്.
സമ്മേളനം 17ന് വൈകിട്ട് സമാപിക്കും.

കേരളത്തിൽ നിന്നും അഖിലേന്ത്യ വൈസ് പ്രസിഡന്റ്‌ ആർ. കുമാർ, സംസ്‌ഥാന പ്രസിഡന്റ്‌ വി.കെ. സദാനന്ദൻ, സെക്രട്ടറി ബി.വിനോദ് എന്നിവരുടെ നേതൃത്വത്തിൽ 75 അംഗ പ്രതിനിധി സംഘം സമ്മേളനത്തിൽ പങ്കെടുക്കുന്നുണ്ട്.