സിനിമാ ലോകത്തെ ഇപ്പോഴത്തെ അവസ്ഥയെക്കുറിച്ച് നടി സജിത മഠത്തിൽ പങ്കുവെച്ച ചില കാര്യങ്ങളാണ് ഇപ്പോൾ സോഷ്യൽ മീഡിയയിൽ ചർച്ചയാകുന്നത്.
സിനിമാ ലോകത്തെ ഇപ്പോഴത്തെ അവസ്ഥയെക്കുറിച്ച് നടി സജിത മഠത്തിൽ പങ്കുവെച്ച ചില കാര്യങ്ങളാണ് ഇപ്പോൾ സോഷ്യൽ മീഡിയയിൽ ചർച്ചയാകുന്നത്.
സിനിമയിലെ ലൈംഗികാതിക്രമ പരാതികളിൽ പല പ്രമുഖരും പുലർത്തുന്ന ആ മൗനത്തിനെതിരെയാണ് സജിത ശബ്ദമുയർത്തിയിരിക്കുന്നത് . സംവിധായകൻ രഞ്ജിത്ത് അറസ്റ്റിലായതിന് പിന്നാലെയാണ് ഈ ഒരു പ്രതികരണം എന്നതും ശ്രദ്ധേയമാണ്. വളരെ പരിഹാസം നിറഞ്ഞ ഒരു ഫേസ്ബുക്ക് പോസ്റ്റിലൂടെയാണ് അവർ തന്റെ നിലപാട് വ്യക്തമാക്കിയത്.
പലപ്പോഴും ചർച്ചകളിൽ പ്രമുഖർ പറയുന്ന സ്ഥിരം ന്യായീകരണങ്ങളെ സജിത തന്റെ പോസ്റ്റിൽ കളിയാക്കുന്നുണ്ട്. “ഞാനും നീതിന്യായ വ്യവസ്ഥയിൽ വിശ്വസിക്കുന്നു”, “അവൾ ഐസിയിൽ പരാതി കൊടുത്തില്ലല്ലോ”, “കേസ് കോടതിയിൽ ആയതുകൊണ്ട് കൂടുതൽ സംസാരിക്കാനില്ല” എന്നൊക്കെയുള്ള പല്ലവികൾ എത്രത്തോളം പൊള്ളയാണെന്ന് അവർ ഇതിലൂടെ പറയാതെ പറയുന്നുണ്ട് . ഇതൊരു ഗൂഢാലോചനയാണെന്നും, പരാതിപ്പെട്ട പെണ്ണിന് അഭിനയിക്കാൻ അറിയില്ലെന്നുമൊക്കെ പറഞ്ഞു തള്ളുന്ന രീതിയെ അവർ രൂക്ഷമായി തന്നെ വിമർശിക്കുന്നു.
ഒടുവിൽ സജിത പറയുന്ന ഒരു കാര്യം സിനിമാ ലോകത്തെ ഒരു നഗ്നസത്യമാണ്. പരാതി കൊടുത്തവൾ എക്കാലത്തും പുറത്തായിരിക്കും, പക്ഷേ കുറ്റം ആരോപിക്കപ്പെട്ടവർ ശക്തമായി തന്നെ തിരിച്ചുവരും, അവർ വീണ്ടും സിനിമയെടുക്കും കൂടെ നിൽക്കുന്നവരെ സിനിമയിൽ കാണിക്കില്ലെന്ന ഭീഷണിയും അവിടെ നിലനിൽക്കുന്നുണ്ട്. സിനിമയിലെ ഈ ഇരട്ടത്താപ്പിനെ വളരെ കൃത്യമായി തന്നെ സജിത മഠത്തിൽ തന്റെ കുറിപ്പിലൂടെ തുറന്നുകാട്ടിയിരിക്കുകയാണ്
